Næturlífið færist vestur fyrir læk

Heitustu skemmtistaðirnir eru nú flestir fyrir vestan Lækjargötu. Þessi þróun hefur átt sér stað á skömmum tíma en er í raun afturhvarf til þess sem áður var. Fréttablaðið kannaði málið.

Fyrir aldamótin síðustu blómstraði skemmtanalífið í kringum Austurstræti og Hafnarstræti og borgarbúar sóttu skemmtistaði á borð við Gauk á Stöng, Tunglið, Wunderbar, Skuggabar, Thomsen og Kaffi Gróf. Nokkrum árum seinna voru skemmtistaðirnir fluttir á Laugaveginn og fáir skemmtu sér „hinum megin við læk“. Nú virðist sem skemmtanalíf hafi færst aftur í æðar Austurstrætis með tilkomu nýrra skemmtistaða.

Á síðastliðnum mánuðum hafa æ fleiri skemmtistaðir litið dagsins ljós í kringum Austurstræti og má þar nefna Bakkus, Batteríið og Sódóma sem allir eru við Tryggvagötu, skemmtistaðina Austur og Jacobsen í Austurstræti og Kaffi Zimsen við Hafnarstræti.

Skemmtistaðurinn Bakkus virðist hafa fyllt það skarð sem frægasti bar Íslands, Sirkus, skildi eftir sig. Margar helstu listaspírur borgarinnar sækja þennan stað og dreypa á pólskum vodka. Skemmti- og matsölustaðurinn Austur var einnig opnaður í sumar og er meðal annars í eigu fjölmiðlamannsins vinsæla, Ásgeirs Kolbeins, sem sést iðulega á staðnum um helgar. Jacobsen kom í stað skemmtistaðarins Rex og minnir stemningin þar nokkuð á stemninguna sem ríkti forðum daga á hinum goðsagnakennda stað Café Thomsen.

Plötusnúðurinn Kristján Jónsson, betur þekktur sem Kiddi Bigfoot, hefur verið skemmtanastjóri og plötusnúður í hartnær tuttugu ár. Hann segir að þessu beri að fagna. „Hér í gamla daga var allt næturlífið vestan við Lækjargötu, þá var það miðdepillinn, en svo þegar Tunglið brann og Astró fór þá færðist þessi miðdepill ofar. Það er ánægjulegt hvað það er komið mikið líf í miðbæinn, ég held að það sé mikill kostur að hafa staðina svolítið dreifða um bæinn. Nú er bara að bíða og sjá hvort þessir nýju staðir haldi vinsældum sínum,“ segir Kristján.

sara@frettabladid.is