Segir Valitor mismuna viðskiptavinum sínum

„Valitor hefur ekkert lært af reynslunni og heldur áfram að nýta sér markaðsráðandi stöðu sína með ólöglegum aðgerðum," segir Jóhannes Ingi Kolbeinsson, framkvæmdastjóri Kortaþjónustunnar. Eins og fram kom á Vísi fyrr í dag hefur Kortaþjónustan sent kvörtun til Samkeppniseftirlitsins þar sem Valitor er sakað um margvísleg og ítrekuð brot á samkeppnislögum.

„Þetta eru í raun mjög víðtæk brot sem við erum að kvarta yfir. Valitor hefur meðal annars verið með sértækar verðlækkanir þar sem þeir lækka gjöld þeirra viðskiptavina sinna sem við erum að bjóða betri kjör en láta aðra viðskiptavini búa við gömlu kjörin. Þar með eru þeir að mismuna sínum viðskiptavinum til að koma í veg fyrir að við og önnur kortaþjónustufyrirtæki náum af þeim viðskiptum," segir Jóhannes Ingi, í samtali við Vísi.

Jóhannes segir að þetta séu ekki eðlilegir viðskiptahættir á samkeppnisgrundvelli. „Við erum ekki þeir einu sem kvarta, það var gerð húsleit um daginn hjá Valitor og það er með ólíkindum að þeir haldi áfram að nýta sína markaðsráðandi stöðu til að klekkja á samkeppnisaðilunum. Til að húsleit sé gerð þarf héraðsdómur að úrskurða um húsleitina þannig að héraðsdómur virðist að minnsta kosti telja tilefni til frekari athugunar. Þeir læra ekkert af reynslunni en við vitum alveg hvað þeir eru að gera," segir Jóhannes Ingi.

Ekki náðist í Höskuld H. Ólafsson, forstjóra Valitor, þrátt fyrir ítrekaðar tilraunir.