Google valdi Finnland í stað Íslands fyrir tölvumiðstöð

Tölvurisinn Google hafði um skeið mikinn áhuga á því að reisa tölvumiðstöð á Íslandi og hefur víst enn. Hinsvegar valdi Google Finnland fram yfir Ísland fyrsta kastið og keypti hina aflögðu pappírsverksmiðju Summa fyrir utan Helsingfors undir miðstöðina en verksmiðjan kostaði um 7,2 milljarða kr.

Þetta kemur fram í umfjöllun Jyllands-Posten um mikla möguleika norrænu þjóðanna á því að verða ofurveldi í heiminum fyrir tölvumiðstöðvar, gagnageymslur og netþjónabú í framtíðinni.

Magn upplýsinga í heiminum stígur nú ár frá ári með dramatískum hætti. Fleiri sérfræðingar telja að upplýsingamagnið tvöfaldist á 18 mánaða fresti. Til að halda utan um allt þetta upplýsingaflæði leita tölvufyrirtæki nú með logandi ljósi að ákjósanlegum stöðum undir nýjar tölvumiðstöðvar.

Með tölvumiðstöðvum er átt við kæligeymslur fullar af tölvum og diska-kerfum sem yfirleitt eru kúpluð við netið með öflugum tengingum.

Microsoft hefur lengi verið með Grænland í sigtinu sem stað fyrir nýjar tölvumiðstöðvar á sínum snærum en hefur nú beint sjónum sínum austur til Síberíu. „Við erum hrifnir af möguleikunum í Rússlandi en engin ákvörðun liggur enn fyrir af okkar hálfu," var svar Microsoft við fyrirspurn frá Aftenposten um málið.

Svíþjóð, Noregur og Kanada eru nú á fullu í baráttunni um uppsetningar á tölvumiðstöðvum innan sinna landamæra. Nýlega ákvað tölvurisinn Logica að byggja nýja tölvumiðstöð í norðurhluta Svíþjóðar.

Það er einkum kalt loftslag í þessum löndum sem gera þau áhugaverið fyrir tölvufyrirtækin en megnið af kostnaðinum við rekstur slíkra miðstöðva felst í orkureikningnum við að kæla þær niður.

Hvað Ísland varðar má m.a. nefna nýlega frétt hér á síðunni um að þrjár stofnanir á hinum Norðurlandanna hafa áhuga á að koma upp og reka ofurtölvu á Íslandi. Framlag Íslands til verksins yrði ókeypis rafmagn til að reka slíka tölvu en á móti yrðu Íslendingar væntanlega meðeigendur og gætu nýtt sér tölvuna.

Þetta verkefni er á umræðustigi ennþá en reiknað er með að ákvörðun um byggingu ofurtölvunnar verði tekin í haust.