Alvanos: Ólafur Stefánsson var mín fyrirmynd

Grikkinn Alexis Alvanos hlakkar mikið til að spila með Íslendingaliðinu Rhein-Neckar Löwen næsta vetur. Sérstaklega hlakkar hann til að spila með Ólafi Stefánssyni sem var hans átrúnaðargoð á árum áður.

„Það verður hörð keppni um sæti hjá Löwen næsta vetur. Það verður mjög gaman að vinna með Ólafi Stefánssyni sem var alltaf mín fyrirmynd sem handboltamaður. Verður gaman að sjá hvar ég stend við hliðina á honum. Þó svo ég líti upp til hans mun ég ekki gefa neitt eftir og berjast um sæti í liðinu," sagði Alvanos sem einnig er örvhent skytta.

Grikkinn er ekki óvanur því að spila með Íslendingum en hann kemur til Löwen frá Gummersbach þar sem hann lék með Róbert Gunnarssyni, Sverre Jakobssyni og Guðjóni Val Sigurðssyni sem hann hittir einnig fyrir hjá Löwen.

Svo þjálfaði Alfreð Gíslason líka Gummersbach með Alvanos innanborðs.