Stefni klárlega á að vera með á EM

Landsliðsmaðurinn Ásgeir Örn Hallgrímsson hefur leikið vel með liði sínu GOG Svendborg eftir að hafa snúið aftur úr erfiðum hnémeiðslum sem héldu honum utan vallar í tæpt hálft ár.

Ásgeir Örn hóf endurkomu sína sem kunnugt er með stæl í byrjun nóvember þegar hann tryggði GOG 24-23 sigur gegn Bjerringbro-Silkeborg með sigurmarki á lokasekúndunni. GOG tapaði reyndar næsta leik gegn fallbaráttu­liðinu Århus GF en fékk svo heldur betur uppreisn æru í fyrrakvöld þegar liðið vann ellefu marka stórsigur, 35-24, gegn toppliðinu KIF Kolding þar sem Ásgeir Örn skoraði þrjú mörk.

„Þetta var helvíti þétt hjá okkur og virkilega vel gert. Við bara völtuðum yfir þá eins og sagt er. Þetta er vissulega sterk yfirlýsing sem við erum að senda með þessum sigri en við töpuðum reyndar fyrir liðinu í næstneðsta sæti í umferðinni þar á undan. Þannig að það má kannski segja frekar að við séum að senda frá okkur svona blendin skilaboð. Við verðum samt að reyna að byggja á þessum góða sigri í síðasta leik. Það er það sem þetta snýst um," segir Ásgeir Örn.

Ásgeir Örn kveðst eðlilega ekki vera kominn í sitt gamla form enn eftir langvarandi meiðsli en er bjartsýnn á að þau séu nú að baki.

„Mér finnst ég náttúrlega ekki vera alveg sami maður og fyrir meiðslin og það er ekkert óeðlilegt miðað við hvað ég var lengi frá. Maður er ekki jafn sterkur og ekki jafn snöggur og áður og á enn smá í land með þá þætti en það kemur allt á endanum. Ég fór í aðgerð á hnénu og finn alveg fyrir því en það er ekkert sem ég hef áhyggjur af eða er eitthvað óeðlilegt. Maður þarf bara að passa sig og hugsa vel um þetta svo þetta taki sig ekki upp aftur," segir Ásgeir Örn.

Hann er harðákveðinn í því að vera klár í slaginn með íslenska landsliðinu fyrir EM í Austurríki í janúar. „Ef ég verð heill áfram þá stefni ég klárlega á að vera með landsliðinu á EM en það er auðvitað hlutverk Guðmundar [Guðmundssonar, landsliðsþjálfara og þjálfara GOG] að velja liðið. Ég hef svo sem ágætis glugga til að sýna mig fyrir honum," segir Ásgeir Örn á léttum nótum.