NFL-leikmaður féll af pallbíl og lést

Chris Henry, leikmaður Cincinnati Bengals í NFL-deildinni, lést í morgun aðeins 26 ára að aldri. Hann féll þá aftan af pallbíl og lést.

Svo virðist sem Henry hafi verið að rífast við unnustu sína skömmu áður en hann lést. Unnustan keyrði svo í burtu en Henry kom hlaupandi á eftir og stökk upp á pallinn á pallbílnum. Skömmu síðar féll hann af bílnum og lést af sárum sínum.

Henry skilur eftir sig þrjú börn sem hann átti með unnustunni.

Ferill Henry hjá Bengals var æði skrautlegur enda átti hann erfitt með að hemja skap sitt. Var hann alls fimm sinnum dæmdur í leikbann á stuttum ferli.

Að sögn forráðamanna Bengals var hann þó á góðri leið með að koma lífi sínu á réttan kjöl þegar harmleikurinn dundi yfir.