Stjórnin stendur og fellur með Icesave

Ríkisstjórnin stendur og fellur með Icesave málinu, samkvæmt heimildum fréttastofu. Allt íslenskt efnahagslíf sé í gíslingu málsins. Ögmundur Jónasson, heilbrigðisráðherra segir svo ekki vera, en væntir lausnar.

Ögmundur Jónasson, heilbrigðisráðherra Vinstri grænna, segir að Icesave málið snúist um að hlaða ekki skuldaklafa á þjóðina. Hann finni ríkan vilja í öllum flokkum til að ná sem breiðastri samstöðu um fyrirvara við ríkisábyrgð um Icesave sem tryggi hagsmuni Íslands sem best.

Fjárlaganefnd vinnur nú að því að gera fyrirvara við frumvarp um ríkisábyrgðina. Ekki náðist í nefndarmenn í morgun. Fulltrúar stjórnarandstöðu hafa talað um að fyrirvarar sem þar er rætt séu ekki nægir.

Heimildarmenn fréttastofu innan ríkisstjórnarinnar segja að fari svo að Ögmundur Jónasson, og raunar einnig Guðfríður Lilja Grétarsdóttir, og Lilja Mósesdóttir, þingkonur Vinstri grænna, greiði ekki atkvæði með frumvarpi ríkisstjórnarinnar, sé samstarfinu sjálfhætt. Ríkisstjórnarsamstarfið standi og falli með Ögmundi. Það sé margt sem hangi á Icesave málinu; allt íslenskt efnahagslíf sé í gíslingu málsins. Þessa skoðun heyrir fréttastofa bæði í röðum ráðherra Vinstri grænna og Samfylkingarinnar.

Ögmundur Jónasson, er á öðru máli. Hann hafi alltaf sagt að ríkisstjórnin hafi ekki verið mynduð um tiltekna niðurstöðu í Icesave málinu heldur velferðarsamfélagið. Skoða verði þessi mál í því samhengi.

Aðrir ráðherrar í ríkisstjórn telja að ríkisstjórnin geti náð lendingu í málinu, „fyrir eigin vélarafli" eins og það var orðað.

Steingrímur J. Sigfússon, fjármálaráðherra og formaður VG, segir þýðingarlaust að vera með vangaveltur um óorðna hluti. Við verðum að bíða og sjá.