Milljarða lóðasala Kópavogsbæjar gæti endað fyrir dómstólum

Milljarða lóðasala Kópavogs í Glaðheimum er í uppnámi og kann að enda fyrir dómstólum. Kaupandi vill rifta samningi, en bærinn neitar.

Kópavogsbær keypti Glaðheimaland í maí 2006 fyrir 3,2 milljarða króna. Þar höfðu hestamenn úr Gusti verið lengi með aðstöðu. Bærinn vildi bæta hestamönnum þetta upp með því að verja tveimur milljörðum í að byggja um nýja aðstöðu á Kjóavöllum.

Bærinn seldi svo Glaðheimalandið fyrir sex og hálfan milljarð króna í byrjun árs 2007. Félagið Kaupangur keypti um tvo þriðju landsins og átti að greiða fyrir 4,3 milljarða. Smáratorg keypti eftirstandandi þriðjung en skilaði lóðum sínum til bæjarins í haust.

Kaupangur vill nú rifta sínum kaupsamningi og hefur falið lögmönnum sínum samskipti við bæinn. Bærinn hefur svarað og hafnar því að Kaupangur eigi rétt á að hafna samningnum. Málið er einnig á borði bæjarráðs Kópavogs.

Jóhannes Sigurðsson, annar eigenda Kaupangs, segir að umsamið land hafi ekki ennþá verið afhent. Kaupangur hafi greitt 500 milljónir króna í hitteðfyrra, vegna þessa. Þetta fé þurfi að koma til baka.

Samstarfið við Kópavogsbæ hafi ætíð verið með ágætum, en félagið hafi orðið fyrir tjóni af því að fá ekki landið. Verði önnur leið ekki fær, þurfi að leita til dómstóla.

Málið gæti endað þar því Kópavogsbær segir líka að Kaupangur hafi ekki staðið við skuldbindingar sínar. Lítið af kaupverðinu hafi verið greitt og félagið skuldi líka gatnagerðargjöld.