Er tilbúinn að skoða skattaafslátt gegn upplýsingum

„Ég er alveg tilbúinn að taka þetta til skoðunar," segir Steingrímur J. Sigfússon, fjármálaráðherra, aðspurður um þá hugmynd að veita fjármagnseigendum skattaafslátt í skiptum fyrir upplýsingar um innistæður þeirra á aflandsreikningum.

Skattrannsóknarstjóri sagði í viðtali í kvöldfréttum Rásar eitt að vert væri að skoða þann möguleika. Bresk yfirvöld hafa þegar ákveðið að fara þá leið að veita breskum fjármagnseigendum í Liechtenstein slíkan afslátt greini þeir sjálfir frá innistæðum sínum.

„Ég veit að þeir hjá skattinum hafa verið að vinna ötult starf í þá átt að upplýsa þessi mál. Við tökum fagnandi öllum hugmyndum þaðan og skoðum þær," segir Steingrímur, sem hafði þó ekki séð frétt RÚV.

Steingrímur segist tilbúinn að veita skattayfirvöldum liðsinni, og bendir í því samhengi á frumvarp sem hann lagði fram í þinginu í dag.

Í frumvarpinu, sem beinist að lögum um tekjuskatt, er kveðið á um rýmri heimildir skattrannsóknarstjóra til að kyrrsetja eignir til tryggingar greiðslu væntanlegrar skattkröfu, fésektar eða sakarkostnaðar ef hætta þykir á að eignum verði annars skotið undan eða þær glatist eða rýrni.