Líf ríkisstjórnarinnar í höndum Ögmundar

Haldi Ögmundur Jónas­son heilbrigðisráðherra fast við andstöðu sína við Icesave-málið er ríkisstjórnarsamstarfi VG og Samfylkingarinnar úr sögunni. Um það eru þingmenn í báðum flokkum sammála.

Sjálfur telur Ögmundur að ríkis­stjórnin geti starfað áfram þótt Icesave-málið verði fellt. Samkvæmt heimildum Fréttablaðsins er það mat hans að ríkis­stjórnin geti í framhaldinu unnið betur úr málinu og haldið ótrauð áfram með önnur brýn verkefni.

Ögmundur telur að drög meirihluta fjárlaganefndar Alþingis að fyrirvörum við ríkisábyrgð á Icesave-samningunum gangi allt of skammt. Hann hefur kynnt nefndinni eigin tillögur að fyrir­vörum en mat stjórnarliða er að þeir felli samningana.

Ögmundur er ekki einn á báti í flokki sínum. Guðfríður Lilja Grétarsdóttir og Lilja Mósesdóttir hafa báðar lýst sig andvígar Icesave-málinu. Stjórnar­flokkarnir hafa fimm manna þingmeirihluta og mega við því að tveir þingmenn greiði atkvæði gegn málinu - fari svo að allir stjórnarandstæðingar greiði atkvæði á móti.

Samkvæmt heimildum Fréttablaðsins er mikill titringur innan VG vegna ástandsins og er samband Ögmundar og Steingríms J. Sigfússonar formanns sagt stirt. Reynt var að sætta sjónarmið þeirra á sérstökum fundi í síðustu viku en án árangurs.

Steingrímur hefur lagt allt í sölurnar fyrir samþykkt Icesave og telur sig illa svikinn ef Ögmundur leggst gegn málinu. Afstaða Steingríms til málsins sjálfs er raunar sú að samþykkt þess sé lífsnauðsyn íslensku efnahagslífi.

Þingmenn Samfylkingarinnar telja sig lítið geta aðhafst í málinu og segja að VG-menn verði að leysa það sín á milli.

Fjárlaganefnd mun áfram fjalla um Icesave og er nú stefnt að því að hún afgreiði málið frá sér á morgun eða á fimmtudag.