Anichebe sér ekki eftir neinu

Victor Anichebe, leikmaður Everton, segist ekki sjá eftir neinu varðandi samskipti sín við David Moyes, knattspyrnustjóra liðsins.

Enskir fjölmiðlar greindu frá því í upphafi mánaðarins að Anichebe hafi misst stjórn á skapi sínu þegar honum var neitað um félagaskipti til Hull á lokadegi félagaskiptagluggans. Hann mun hafa notað móðgandi orðbragð gagnvart Moyes.

Síðan þá hefur Anichebe beðist afsökunar á hegðun sinni en Moyes hefur engu að síður skilið hann eftir úti í kuldanum.

„Ég hef lært að sjá ekki eftir neinu," sagði hinn tvítugi Anichebe í samtali við enska fjölmiðla. „Maður á að draga lærdóm af öllu því sem gerist í lífinu. Aldrei horfa til fortíðar - bara framtíðar. Maður getur ekki breytt fortíðinni en aðeins haft áhrif á framtíðina. Maður þarf að búa sig undir hvað getur gerst næst."