Jafntefli í Íslendingaslag

IFK Gautaborg og Helsingborg gerðu í dag 2-2 jafntefli í sænsku úrvalsdeildinni í knattspyrnu. Ólafur Ingi Skúlason lagði upp jöfnunarmark Helsingborg.

Ólafur Ingi lék allan leikinn í liði Helsingborg. Hjálmar Jónsson og Ragnar Sigurðsson voru í byrjunarliði Gautaborgar. Ragnari var skipt út af á 72. mínútu. Theodór Elmar Bjarnason kom inn á sem varamaður á 80. mínútu í liði Gautaborgar.

IFK Gautaborg komst aftur á topp deildarinnar í dag en liðið er nú með jafn mörg stig og Elfsborg. Helsingborg er með 35 stig í þriðja sæti deildarinnar, aðeins einu stigi á eftir toppliðunum tveimur.

Kalmar og AIK koma næst með 34 stig en síðarnefnda liðið á leik til góða á hin liðin fjögur.