Kópavogsbær og Árborg semja við Saga Capital

Kópavogsbær og sveitarfélagið Árborg hafa samið við Saga Capital Fjárfestingarbanka um sölu og umsjón á opnu skuldabréfaútboði á innlendum verðbréfamarkaði. Í tilkynningu frá Saga Capital segir nú þegar sé búið að selja skuldabréf fyrir Kópavogsbæ fyrir alls 2,4 milljarða en bærinn stefnir að því að sækja sér alls 3 milljarða að láni með skuldabréfaútgáfunni. Skuldabréfaútboð Árborgar er upp á einn milljarð króna og af því er búið að selja 860 milljónir.

„Markmið skuldabréfaútgáfunnar er að tryggja sveitarfélögunum fjármagn til framkvæmda á næstu misserum og mæta afborgunum eldri lána. Stefnt er að því að ljúka skuldabréfaútboðunum fyrir áramót," segir ennfremur.

Þá segir að bréf Kópavogsbæjar séu verðtryggð jafngreiðslubréf í opnum flokki til 10 ára, með 5% nafnvexti og tveimur afborgunum á ári. Bréf Árborgar eru líka verðtryggð jafngreiðslubréf sem endurspegla HF 24, skuldabréfaflokk Íbúðalánasjóðs. Nafnvextir eru 5% og afborganir tvisvar á ári.

„Askar Capital hefur umsjón með fjármögnuninni fyrir hönd sveitarfélaganna en Saga Capital Fjárfestingarbanki hefur umsjón með útboðinu og mun sjá um skráningu skuldabréfanna í Kauphöll Íslands," segir að lokum.