Árni bæjarstjóri kvaddur

Nú syrtir í álinn fyrir Árna bæjarstjóra. Hefurðu komið á efri hæð Sparisjóðsins við Tjarnargötu þar sem bæjarskrifstofurnar eru til húsa? Þar er nú hrúgað saman þrem til fjórum starfsmönnum í hvert herbergi. Annað eins ástand hefur ekki komið upp í Keflavík eða Njarðvík enda sveitarfélagið nú eignalaust utan hlutar þess í Hitaveitunni.

Hvar er nú kraftaverkamaðurinn frá Vestmannaeyjum?

En þetta er bara hluti af vandanum. Hefurðu orðið var við að verk séu boðin út hjá bænum í seinni tíð og samkvæmt stefnuskrá Sjálfstæðisflokksins? Nei, þau eru færð Fasteign eða Nesprýði.

Og hvaða trakteringar fá þeir sem sýna velvilja, gefa gjafir? Þeim er sýndur dónaskapur af verstu gerð. Dæmi: Byggðasafnið á Vatnsnesi hefur verið lokað í langan tíma. Það var gjöf ekkju Jóhanns Guðnasonar til bæjarins. Ættingjar Bjarnfríðar eru ekki hressir og hafa leitað til lögfræðings. Mér finnst að á Vatnsnesi eigi að rísa svipað hverfi og á Akranesi. Uppbygging á Vatnsnesi var vilji og heitasta ósk heiðursmannanna: Ólafs Þorsteinssonar, Skafta Friðfinnssonar og Guðleifs Sigurjónsonar.

Og hvað með heilbrigðismálin?

Þau eru svo sannarlega ekki efst á lista Árna Sigfússonar. Það var Böðvar Jónsson bæjarfulltrúi, sem tók af skarið á frægum fundi á Flughóteli, þegar við forystumenn eldri borgara afhentum um 2.200 mótmæli vegna óviðunandi ástands í hjúkrunar og heilbrigðismálum á svæðinu. Böðvar sagði: Það er útilokað að hundsa svona víðtæk mótmæli.

Á ekki að auglýsa stöður hjá bænum.

Nei segir Árni, þær eru til að verðlauna flokksgæðinga. Dæmi: Ragnar Örn Pétursson. Fyrst var hann ráðinn forvarnarfulltrúi, síðan Íþrótta- og tómstundafulltrúi. Í hvorugt skiptið var staðan auglýst en hér á í hlut kosningasmali fyrir flokkinn - maður sem á að baki óglæsilegan feril svo ekki sé meira sagt.

Lokaorð.

Ég tel mig ekki hafa verið fordómafullan gagnvart Árna Sigfússyni í upphafi ferils hans hér. Sigfús, faðir hans var skólabróðir minn úr Gagnfræðaskóla Vesturbæjar og við höfðum töluvert samband. Ingibjörg Johnsen, frænka Árna, var stúkufélagi í bindindishreyfingunni.

Þess vegna hélt ég að ég fengi hljómgrunn fyrir mín áhugamál, menningarmál og málefni aldraðra. Því var ekki að heilsa. Sjálfstæðismenn undir forystu Árna sýndu til dæmis málum aldraðra fullkomið tómlæti. Á opnum fundi í Stapa um þau mál komu bæjarfulltrúar Samfylkingar og Framsóknar og gamlir oddvitar Sjálfstæðismanna eins og Tómas Tómasson En lið Árna var allt fjarverandi. Sama er uppi á teningunum í menningarmálum. Mér blöskrar framkoman í Vatnsnesmálinu. Og enginn áhugi er fyrir áframhaldi á sögu Keflavíkur. Framgangan í Hitaveitunni þar sem Grindavík og Vogar hafa myndað bandalag með Hafnarfirð og spillingin við úthlutun á aðstöðu til vina og flokksfélaga á Keflavíkurflugvelli, nær engu tali. Nú er mælirinn fullur: Því fyrr sem Árni yfirgefur sitt sæti því betra fyrir hans flokk og íbúa alls svæðisins.