Þýsk fjármálafyrirtæki með áhuga á Íslandi bíða vegna óvissu

Þýsk fjármálafyrirtæki sem höfðu hug á að koma hingað til lands í haust og bjóða fasteignalán í evrum hafa ákveðið að bíða með það um sinn vegna óvissu í efnahagsmálum.

Í apríl sl.sagði Fréttastofa Stöðvar 2 frá því að þýsk fjármálafyrirtæki væru að skoða húsnæðislánamarkaðinn hér á landi með það fyrir augum að veita fasteignalán í evrum þegar kemur að uppgreiðsluglugga bankanna haustið 2009.

Hallur Magnússon vann áður hjá Íbúðalánasjóði en starfar nú sem sjálfstæður ráðgjafi. Hann hefur verið að aðstoða fyrirtækin við að meta íslenska húsnæðismarkaðinn og möguleikana á því að koma hingað til lands. Hallur segir að fyrirtækin hafi haft hug á að koma hingað í haust en vegna óvissu í efnahagsmálum vilji þau bíða lengur og sjá hvernig málin þróast.

Margir húseigendur sem skuldbreyttu eða tóku fasteignalán fyrir tæpum fjórum árum sjá fram á verulega vaxtahækkun haustið 2009 og mánuðina þar á eftir. Þá taka gildi endurskoðunarákvæði hjá mörgum viðskiptavinum Glitnis og Sparisjóðanna og einhverra hjá Landsbankanum.

Flestir búast við því að þá muni bankarnir nota tækifærið til að hækka vextina enda hafa vextir á húsnæðislánum þeirra hækkað verulega síðan þá. Í þessu sjá evrópsk fjármálafyrirtæki tækifæri.