Nýr forstjóri Actavis: Engar stórvægilegar breytingar framundan

„Þetta leggst mjög vel í mig. Þetta er mikið verkefnið og frábært fyrirtæki, fimmta stærsta samheitalyfjafyrirtæki í heimi. Markaður fyrir samheitalyf er að vaxa og það er frábært tækifæri að taka fyrirtækið áfram," segir nýráðinn forstjóri Actavis, Sigurður Óli Ólafsson, og bætir við að hann taki við góðu búi.

Róbert var ekki rekinn

Sigurður þvertekur fyrir að Róbert Wessmann, fráfarandi forstjóri Actavis, hafi verið rekinn, eins og ýmsar sögusagnir hafa verið uppi um, og telur að hann hafi hætt á réttum tíma. „Ég held að þetta hafi verið ákveðinn tímapunktur. Það er ár liðið frá því að fyrirtækið var einkavætt og þá á sér stað ákveðin breyting á „strategíu" þegar fyrirtækið er tekið af markaði. Ég held því að Róbert hafi hætt á hárréttum tíma til að fara að sinna sínum verkefnum."

Samheitalyfjamarkaðurinn er sterkur

Sigurður Óli er hvergi banginn þrátt fyrir að umræðan á sviði viðskipta hafi verið heldur neikvæð undanfarið. Hann segir að samheitalyfjamarkaðurinn sé sterkur enda hefur efnahagskreppa lítil áhrif á sölu lyfja. Jafnvel sé það svo að á krepputímum taki almenningur oft samheitalyf fram yfir frumlyf.

Sóknin beinist að Bandaríkjunum

Með nýjum forstjóra fylgja nýjar áherslur þó Sigurður segi að ekki megi vænta neinna stórvægilegra breytinga á rekstri Actavis. „Það verða auðvitað einhverjar áherslubreytingar og smávægilegar breytingar innan húss. Breyttar áherslur verða þá kannski að það verður meiri fókus á okkar innri vöxt á lykilmörkum þar sem við sjáum tækifæri með þeim lyfjum sem við erum að vinna að í dag. Við erum einnig að skoða aukin tækifæri í að vera fyrst með lyf á markað í Bandaríkjunum. Ef þú ert fyrstur á markað með lyf í Bandaríkjunum þá gefur það þér ákveðin markaðstækifæri því þú ert einn á markaðnum í sex mánuði. Við erum að skoða að einblína meira á þann þátt en venjulega. En yfirhöfuð verða engar breytingar á stefnu fyrirtækisins," segir Sigurður að lokum.