Fá 45 prósentum hærra verð fyrir fiskinn en í fyrra

Verðbólga á Íslandi hefur ekki verið hærri í átján ár. Hún er nú komin í 13,6 prósent. Útflytjendur standa hins vegar mun betur að vígi en í fyrra og fiskútflytjendur fengu í sumar nærri 45 prósentum hærra verð fyrir fiskinn en á sama tíma á síðasta ári.

Hagstofan sendi í dag frá sér nýja Hagvísa sem boða bæði góð tíðindi og slæm. Slæmu tíðindin eru að vísitala neysluverðs hækkaði í júlí um tæpt prósent frá því í júní sem þýðir að verðbólga á landinu er komin í 13,6 prósent. Eftir því sem næst verður komist er verðbólgan óvíða hærri í Evrópu og helstu viðskiptalöndum.

Góðu tíðindin eru þau að vísitala framleiðsluverðs hefur hækkað um nærri 30 prósent á einu ári. Í júní var hún sum sé 29,4 prósentum prósentum hærri en hún var í júní á síðasta ári. Það þýðir að þeir sem framleiða vörur á Íslandi eru að fá tæplega þrjátíu prósentum fleiri krónur fyrir framleiðsluna nú en í fyrra.

Þarna vegur fiskur og ál þungt. Fiskútflytjendur eru að fá núna næstum 45 prósentum hærra verð fyrir fiskinn en í fyrra og stóriðjan, þar sem álframleiðslan vegur þyngst, rétt rúmlega 36 prósentum meira. Þá var í júlí 18,5 prósentum dýrara að byggja en á sama tíma í fyrra.

Fólk notar kreditkortin æ meir, velta þeirra jókst um tæp tólf prósent á fyrri hluta ársins miðað við sama tíma í fyrra. Og þó að launavísitalan hafi hækkað milli mánaða hefur kaupmáttur launafólks dregist saman um 3,7 prósent milli júní nú og í fyrra.