Ingibjörg stjórnarformaður FL Group

„Þetta er mikil ábyrgð sem ég tek alvarlega,“ segir Ingibjörg Pálmadóttir, nýr stjórnarformaður FL Group.

Ný stjórn FL Group var kjörin á hluthafafundi í gær. Þá var stjórninni breytt þannig að í henni sitja fimm í stað sjö áður. Jón Ásgeir Jóhannesson, Pálmi Haraldsson og Hannes Smárason ganga úr stjórn, en Ingibjörg kemur ný inn í stjórnina.

Ný stjórn skipti með sér verkum á sínum fyrsta fundi í gærmorgun og var Ingibjörg valin til forystu.

Hún segir spennandi verkefni fram undan. „FL Group hefur jú mætt mótbyr eins og allir vita en mikil vinna sem lögð hefur verið í endurskipulagningu félagsins síðasta hálfa árið er farin að skila árangri. Staða FL Group er sterk þrátt fyrir allt og framtíðin er björt.“