Eini íslenski bankinn á ráðstefnu UBS

Hreiðar Már Sigurðsson, forstjóri Kaupþings, kynnti Kaupþing á fjölmennri ráðstefnu fyrir alþjóðlega fjárfesta sem risabankinn UBS stendur fyrir og fer fram í New York.

UBS 2008 Global Financial Services-ráðstefnan er ein af helstu bankaráðstefnum ársins. Viðstaddir eru allir stærstu bankar heims en ráðstefnunni, sem hófst á mánudag, lýkur í dag.

Kaupþing er eini íslenski bankinn á ráðstefnunni í ár, en alls kynntu forstjórar sjötíu banka starfsemi sína fyrir fjárfestum. Þar af er fjórir norrænir bankar, SEB, Nordea og Swedbank auk Kaupþings.

Hreiðar Már var með erindi sitt á mánudag. Næstur á eftir honum í pontu í þeim hluta ráðstefnunnar var svo Sir Fred Goodwin, forstjóri Royal Bank of Scotland.

Hreiðar Már fór yfir hvernig bankanum hefur reitt af í lausafjárkreppunni og óstöðugu rekstrar­umhverfi hér heima vegna veikingar krónunnar. Hann kvaðst ánægður með árangurinn og benti á að nú hefðu borgað sig kostnaðarsamar varnir bankans síðustu ár gegn falli krónunnar.

Þá kynnti hann aðgerðir sem gripið hafði verið til í fjármögnun bankans og nýlega kynntar breytingar í Bretlandi þar sem aflögð verður starfsemi utan kjarnastarfsemi bankans. Eins kvaðst Hreiðar Már ánægður með gengi nýrra EDGE innlánareikninga bankans á netinu og kvað innlagnir á fyrsta fjórðungi einum hafa verið yfir einum milljarði evra.

„Apríl var okkar besti mánuður til þessa og við öflum daglega nýrra viðskiptavina á öllum mörkuðum,“ sagði hann og bað fundargesti glettinn að láta vinsamlegast ekki starfsmenn UBS, sem heldur ráðstefnuna, vita að á næstu tveimur vikum standi fyrir dyrum markaðssókn Kaupþings inn á Svisslandsmarkað með EDGE-reikningana. UBS er sem kunnugt er svissneskur risabanki sem starfar á heimsvísu.