Geysir Green sektað vegna upplýsingaskorts

Samkeppniseftirlitið hefur sektað Geysi Green Energy um hálfa milljón króna vegna þess að fyrirtækið svaraði ekki ósk embættisins innan tiltekins frest í tengslum við áformaðan samruna við Reykjavík Energy Invest.

Geysir Green tilkynnti Samkeppniseftirlitinu í ágúst í fyrra að það hefði keypt fyrirtækið Jarðboranir. Við meðferð þess samruna urðu verulegar breytingar á forsendum samrunans vegna samruna Geysis Green við REI.

Var Samkeppniseftirlitinu ekki tilkynnt um það og því síður var stofnuninni gerð fullnægjandi grein fyrir því þegar í stað er fallið var frá samruna Geysir Green og REI eins og segir á vef Samkeppniseftirlitsins.

Í kjölfar þess að Samkeppniseftirlitinu hafði verið gerð grein fyrir breytingunum svaraði Geysir Green ekki gagnaósk Samkeppniseftirlitsins innan tilskilins frest og taldi embættið það sérlega ámælisvert og sektaði fyrirtækið.