Sturla mætti einn til skýrslutöku

Sturla Jónsson, talsmaður og leiðtogi vörubílstjóra í mótmælum þeirra undanfarnar vikur, mætti til skýrslutöku hjá lögreglu nú skömmu fyrir klukkan níu.

Hann kom ásamt lögfræðingi sínum en enga vörubíla var að sjá en Sturla hafði sagt í gær að hugsanlega myndu félagar hans fylgja honum á bílum sínum á lögreglustöðina. Skömmu eftir klukkan níu mættu hins vegar um tíu félagar hans fyrir utan lögreglustöðina en þeir voru þó ekki á bílum. Tveir vörubílar komu svo skömmu síðar.

Sturla var boðaður í skýrslutöku vegna aðgerða vörubílstjóra síðustu tvær vikur, en eins og alþjóð veit hafa þeir stöðvað umferð á mikilvægum umferðaræðum til þess að vekja athygli á kröfum sínum. Þeir vilja meðal annars að ríkið lækki álögur á eldsneyti, breyti lögum um hvíldartíma og komi upp hvíldarstöðum fyrir atvinnubílstjóra við þjóðveginn víða um land.

Fundir með samgönguráðherra og fjármálaráðherra hafa engu skilað að mati vörubílstjóra sem vilja aðgerðir strax.