Mesta verðlækkun á einbýli í borginni frá árinu 2001

Verðlækkun einbýlis á höfuðborgarsvæðinu er um 2,4% milli mánaðana febrúar og mars. Þetta er mesta lækkun sem mælst hefur frá því í október 2001 þegar það lækkaði um 2,6% frá fyrri mánuði.

Greining Landsbankans fjallar um málið í Vegvísi sínum. Þar segir að hafa skal í huga að miklar sveiflur geta verið milli mánaða, en verðið hefur því sem næst staðið í stað síðustu 3 mánuði.

Tólf mánaða hækkun einbýlis nemur nú 13,6% en í janúar var tólf mánaða hækkunin 17,8% - sú mesta frá því um mitt ár 2006. Þessar niðurstöður styðja áður birtar tölur Fasteignamats ríkisins um að verulega sé að hægjast um á fasteignamarkaði.

Greiningin væntir þess að sú þróun haldi áfram og gerum ráð fyrir að fasteignaverð geti lækkað um allt að 5% á næstu 12 mánuðum.

Fasteignaverð á landinu öllu breyttist lítið á milli febrúar og marsmánaða, eða um 0,32% samkvæmt tölum Hagstofunnar. Fasteignaverð á landsbyggðinni hækkaði um 1,5% og fjölbýli á höfuðborgarsvæðinu hækkaði um nærri 1%.