Krónan hefur lækkað fimm mánuði í röð

Krónan veiktist um 15,3% í marsmánuði, og er það fimmti mánuðurinn í röð sem gengi krónunnar lækkar, en miklar sveiflur hafa verið á gengi krónunnar undanfarna mánuði.

Greining Glitnis fjallar um málið í Morgunkorni sínu. Þar segir að metvelta var á gjaldeyrismarkaði í mars og náði gengisvísitala erlendra gjaldmiðla enn fremur methæðum í mánuðinum þegar hún fór upp í 164,65 stig þann 19.mars.

Viðburðamikill fjórðungur er nú að baki fyrir krónuna sem veiktist um samtals 22,3% á fyrstu þremur mánuðum ársins. Þetta er mesta veiking krónunnar á einum ársfjórðungi síðan hún var sett á frjálst flot fyrir sjö árum síðan.

Það næsta sem krónan hefur komist viðlíka lækkun á einum fjórðungi var á 1. ársfjórðungi 2006 þegar krónan veiktist um rúmlega 14%. Frá því um miðjan júlí á liðnu ári, þegar áhrifa lausafjárkreppunnar fór að gæta, hefur gengi krónunnar veikst um rúmlega 28%. Á sama tíma hefur Úrvalsvísitalan lækkað um 44%.