FME rannsakar vogunarsjóði og Kaupþing íhugar að kæra Bear Stearns

Viðskiptablaðið Financial Times segir í dag að Fjármálaeftirlitið sé komið af stað með opinbera rannsókn á því hvort alþjóðlegir vogunarsjóðir hafi ráðist á krónuna og fellt þannig gengi hennar.

Samhliða þessu segir blaðið að Kaupþing íhugi að höfða mál gegn Bear Stearns fjárfestingabankanum fyrir hlutverk hans í heimsókn hóps forstöðumanna vogunarsjóða til Íslands í janúar síðast liðnum.

Að sögn blaðsins sýnir þetta tvennt vaxandi áhyggjur Íslendinga af meintu hlutverki alþjóðlegra fjárfesta í að veikja krónuna og hlutabréfamarkaðinn í landinu.

Jónas Sigurgeirsson upplýsingafulltrúi Kaupþings staðfesti í samtali við Vísi í morgun að bankinn væri að skoða möguleika á málshöfðun gegn Bear Stearns. Yrði málið skýrt frekar af þeirra hálfu seinna í dag.

Hvað hugsanlega kæru Kaupþings á hendur Bear Stearns varðar segir Financial Times að þar sé um hugsanlega misnotkun bankans á markaðinum að ræða en þrír fulltrúar frá Bear Stearns komu til landsins eftir áramótin ásamt fulltrúum frá fjórum vogunarsjóðum.