713 milljarðar gufað upp í Kauphöllinni frá áramótum

Verðmæti 17 íslenskra fyrirtækja í Kauphöllinni hefur rýrnað um 712,7 milljarða frá áramótum. Mest hefur virði Kaupþings minnkað eða um 148 milljarða. Tvö önnur fyrirtæki, Exista og FL Group, hafa þurft að horfa upp á meira en hundrað milljarða gufa upp frá áramótum.

Og til að bæta gráu ofan á svart fyrir Exista og FL Group þá hafa kjölfestueignir þeirra í íslenskum félögum einnig hrapað. Þannig hefur rúmlega 23% hlutur félagsins í Kaupþing rýrnað um 34,1 milljarð og 39% hlutur þess í Bakkavör um 16,6 milljarða. Rúmlega 30% hlutur FL Group í Glitni hefur rýrnað um 26,8 milljarða.

Eins og gefur að skilja þá hafa stærstu hluthafar fyrirtækjanna einnig þurft að horfa upp á eignir sínar rýrna mikið. Þannig hefur 45,21% hlutur bræðranna Ágústs og Lýðs Guðmundssonar í Exista rýrnað um 50,1 milljarð frá áramótum. Fjárfestingafélagið Kista, sem er í eigu SPRON og nokkurra annarra sparisjóða, hefur þurft að horfa upp á 8,94% hlut sinn í Exista minnka að verðmæti úr 20,1 milljarði í 10,2 milljarða eða um 9,9 milljarða.

Björgólfsfeðgar hafa einnig fundið fyrir erfiðum tímum í Kauphöllinni. Alls hafa þrír lykilhlutir þeirra í Landsbankanum, Straumi-Burðarás og Eimskip rýrnað um 56,3 milljarða. Þar munar mest um rétt rúmlega 40% hlut þeirra í Landsbankanum sem hefur rýrnað um 35,9 milljarða og 32,89% hlut þeirra í Straumi sem hefur rýrnað um 14,8 milljarða.

Hluthafar FL Group hafa einnig fengið þungt högg. Gengi bréfa í félaginu hafa fallið um 55,5% frá áramótum og það hefur komið við stærstu hluthafa félagsins. Baugur Group, sem á 36,47% hlut í FL Group í gegnum BG Capital og Baug Group, hefur þurft að horfa upp á eign sína í félaginu rýrna um 39,8 milljarða frá áramótum. Hlutur Fons, félags Pálma Haraldssonar, varaformanns stjórnar FL Group, upp á 12,21% hefur rýrnað um 13,3 milljarða og hlutur Hannesar Smárasonar hefur rýrnað um 10,8 milljarða.