S&P lækkar mögulega lánshæfismat Glitnis

Alþjóðlega matsfyrirtækið Standard & Poor's tilkynnti í dag að það hefði tekið lánshæfismat Glitnis til skoðunar með möguleika á lækkun. S&P staðfestir lánshæfismat langtíma- og skammtímaskuldbindinga.

Lánshæfismat Glitnis er nú þannig að langtímaskuldbindingar eru metnar A-, en skammtímaskuldbindingar A-2.

Glitnir er eini bankinn á Íslandi sem metinn er af S&P, eftir því sem fram kemur í tilkynningu frá félaginu til Kauphallar Íslands.

„Þessi afstaða S&P kemur í sjálfu sér ekki á óvart í ljósi þeirra aðstæðna sem nú ríkja á mörkuðum," segir Ingvar H. Ragnarsson, framkvæmdastjóri fjárstýringar Glitnis.

Ingvar segir að Glitnir sé eina bankastofnunin á Íslandi sem sé metinn af S&P en lánshæfismatsfyrirtæki hafi almennt verið að endurskoða afstöðu sína til fjölmargra banka í ljósi breyttra markaðsaðstæðna. S&P hafi breytt horfum nokkurra af stærri fjárfestingabönkum heims úr stöðugum í neikvæðar fyrir um mánuði síðan..