Dæmdur til að greiða fimm milljónir í þóknun fyrir hlutabréfakaup

Pálmi Haraldsson, oftast kenndur við eignarhaldsfélagið Fons, var í Héraðsdómi Reykjavíkur í dag dæmdur til að greiða Sigurði Braga Guðmundssyni, fyrrverandi framkvæmdastjóra Plastprents, fimm milljónir króna fyrir milligöngu um kaup á um fimmtungshlut í Plastprenti árið 2004. Sigurður Bragi krafðis hins vegar nærri 165 milljóna króna.

Samkvæmt stefnu Sigurðar Braga á Gunnar Karl, bróðir hans og forstjóri Skeljungs, hafa borið honum þau tíðindi frá Pálma að ef Sigurður Bragi gæti hlutast til um sölu á hlut fjölskyldu Hauks Eggertssonar í Plastprenti, um 20 prósentum, myndi Sigurður Bragi fá hagnaðinn af þeim bréfum við endursölu.

Skildi Sigurður Bragi það þannig að rætt væri um endursölu á ráðandi hlut í Plastprenti og að endurgjald til hans mundi þá nema mismun á kaupverði og sölu­verði þess 20 prósenta hlutar sem hann átti að hafa milligöngu um að kaupa. Eftir um hálfs mánaðar viðræður tókust samningar um kaup hlutanna fyrir um 160 milljónir króna.

Í stefnunni segir svo að Pálmi hafi selt Íslandsbanka hlutinn í ágúst 2005 á um 324 milljónir króna. Mismuninn, 164 milljónir króna, taldi Sigurður Bragi sig eiga að fá fyrir milligönguna.

Pálmi bar því við að hann hefði aldrei persónulega átt neinn hlut í Plastprenti. Skeljungur hf. hafi átt í Plastprenti þegar félag, sem Pálmi var í forsvari fyrir, hafi keypt Skeljung. Þeir hlutir hafi síðan verið seldir Fons sem Pálmi ætti ásamt öðrum. Hvorki Pálmi sjálfur né nokkur annar, sem hafi haft umboð hans, hafi lofað Sigurði Braga hagnaðinum af endursölu fimmtungshlutarins í Plastprenti.

Í málinu var lagður fram tölvupóstur þar sem Pálmi á að hafa boðið Sigurði Braga fimm milljónir fyrir milligönguna sem hann nefndi dagsvinnu.

Dómurinn komst að því að Pálmi hefði beðið Sigurð Braga um að hafa milligöngu um kaupin. Það hafi orðið samkomulag um þóknun en hins vegar skorti sannanir fyrir því að Sigurður Bragi hafi átt að fá hagnaðinn af sölu hlutarins í Plastprenti. Framburður Gunnars Karls Guðmundssonar þar um hefði takmarkað vægi þar sem hann væri bróðir Sigurðar Braga.

Út frá gögnum málsins yrði ekki fundinn annar og réttari mælikvarði á þóknun Sigurðar Braga en þær fimm milljónir sem Pálmi Haraldsson hefði minnst á í tölvupósti.