DIC: Engin tímamörk

Talsmaður fjárfestingarfélagsins DIC frá Dubai hafnaði í dag þeim fregnum að eigendur Liverpool hefðu sólarhring til að svara tilboði félagsins í Liverpool.

Fréttastofa BBC greindi frá því fyrr í dag að DIC hefði boðið 400 milljónir punda í Liverpool og gefið þeim Tom Hicks og George Gillett, eigendum félagsins, sólarhring til að svara tilboðinu.

„Engar tölur hafa verið nefndar opinberlega og viðræður halda áfram. Engin tímamörk hafa heldur verið sett," sagði Jehad Saleh, talsmaður DIC.

Framkvæmdarstjóri DIC, Sameer al-Ansari, staðfesti í morgun að félagið ætti í viðræðum við eigendur Liverpool um kaup á klúbbnum.