Álið fram úr fiskinum í ár

Útflutingsverðmæti áls mun í fyrsta sinn fara fram úr verðmæti útfluttra sjávarafuða á þessu ári samkvæmt útreikningum greiningardeildar Kaupþings. Vitnað er til þeirra á vef Samorku, Samtaka orku- og veitufyrirtækja.

Þar segir einnig að samkvæmt útreikningunum megi búast við því að útflutningsverðmæti áls aukist úr rúmum 80 milljörðum króna í um 135 milljarða á þessu ári og verði komið í um 140 milljarða á árinu 2009.

Niðurskurður á þorskkvóta um þriðjung kemur hins vegar niður á útflutningnum og er reiknað með að verðmæti niðurskurðarins verði á bilinu 15 -20 milljarðar á ári.

Greiningardeild Kaupþings segir enn fremur að hagvöxtur næstu ára muni verða drifinn áfram af viðsnúningi í utanríkisviðskiptum þar sem álútflutningur aukist og innflutningur dragist saman í takt við minnkandi útgjöld þjóðarinnar.

Búist er við samdrátti í fjárfestingu á þessu ári en svo eykst hann aftur á næsta ári sem helgast eingöngu af Helguvíkurverkefninu, en gert er ráð fyrir að þær framkvæmdir hefjist í ár og nái hámarki á næsta ári.

Loks segir í hagspá greiningardeildar Kaupþings að umræða um byggingu álvers á Bakka við Húsavík muni verða háværari þegar líði undir lok núverandi hagsveiflu og fleiri merki um niðurskurð taki að berast.