Össur, SPRON og 365 birta afkomuna í vikunni

Nú hafa uppgjör stærstu fyrirtækjanna í Kauphöllinni verið birt en nokkur mikilvæg uppgjör eru þó enn væntanleg. Í þessari viku munu Össur, SPRON og 365 birta afkomutölur sínar fyrir fjórða ársfjórðung síðasta árs.

Össur mun birta sitt uppgjör á þriðjudag. Greining Glitnis telur að félagið nái að uppfylla áætlun stjórnenda um rekstartekjur upp á 330 milljonir Bandaríkjadala fyrir árið 2007, eða um 20 milljarða kr., og að hagnaður síðasta ársfjórðungs hafi numið um 7,2 milljón dollara eða um 450 milljónum kr.

SPRON mun birta afkomu sína á miðvikudag og gerir greiningin ráð fyrir tapi upp á um 6.5 milljarða kr. á fjórða ársfjórðungi ársins 2007.

365 mun svo birta sínar afkomutölur á fimmtudag. Þar sem rekstur félagins gekk vel á árinu gerir greiningin ráð fyrir að hagnaður á fjórða ársfjórðungi hafi numið um 130 milljónum kr. og að félagið sé nálægt markmiðum sínum.