Víkingastyttan af Hard Rock er á skrifstofu Jóns Ásgeirs

Jón Ásgeir Jóhannesson er í viðtali í nýjasta tölublaði Business Week. Þar ræðir hann við blaðamann um mögulega yfirtöku Baugs á bandarísku lúxusversluninni Saks í New York auk þess sem farið er yfir feril hans. Í viðtalinu kemur meðal annars fram að styttan af Leifi Heppna sem stóð í Hard Rock Café í Kringlunni á meðan sá staður var og hét, er niðurkomin í höfuðstöðvum Baugs í London.

Úttekt blaðamannsins er á svipuðum nótum og aðrar úttektir af íslenskum „útrásarvíkingum" og sagt að styttan af Leifi sé hugsuð sem áminning til þeirra sem gleyma uppruna Jóns og félaga í Baugi.

Í niðurlagi viðtalsins kemur fram að Jón Ásgeir hafi lítinn tíma til að dveljast á Íslandi þessa dagana heldur skipti hann tímanum sínum á milli glæsiíbúðarinnar við Gramercy park í New York og íbúðar sinnar í London. Honum er líst sem vinnuþjarki sem alltaf sé með hugann við viðskiptin. Þegar hann fór í brúðkaupsferð sína á dögunum þar sem hann eyddi tveimur dögum í París með eiginkonu sinni, var hann alltaf í símanum að ræða málefni baugs. Jafnvel þegar ég er ekki að vinna er ég að hugsa um viðskipti," segir Jón Ásgeirs.

Hér má lesa viðtalið við Jón Ásgeir.