Moody´s segir Aaa einkunnir ríkissjóðs á krossgötum

Aaa lánshæfiseinkunnir ríkissjóðs Íslands eru á krossgötum, samkvæmt nýrri skýrslu matsfyrirtækisins Moody's Investors Service. Í skýrslunni er ekki tilkynnt nein breyting lánshæfiseinkunnanna.

Í tilkynningu frá Seðlabankanum um skýrsluna segir að samkvæmt áliti Moody's kemur Ísland vel út í samanburði við mörg önnur þróuð iðnríki sem einnig hafa lánshæfiseinkunnirnar Aaa þegar litið er til lágrar skuldastöðu hins opinbera á Íslandi, stjórnkerfis sem byggist á sáttaviðleitni og skilvirkra stofnana. Á móti kemur að íslenska ríkið er hugsanlega berskjaldaðra gagnvart trúverðugleikabresti en önnur ríki með Aaa-einkunnir vegna mikilla alþjóðlegra umsvifa stórra íslenskra viðskiptabanka.

„Ísland nýtur hárra tekna á mann og háþróaðra stjórnar-, hag- og samfélagsstofnana, aldursskipting er hagstæð og lífeyrissjóðir fjármagnaðir að fullu", segir sérfræðingur Moody's, Joan Feldbaum-Vidra, sem er höfundur skýrslunnar. „Hlutfallslega eru skuldir hins opinbera minni en helmingur meðaltalsskulda hins opinberra í ríkjum evrusvæðisins."

Þrátt fyrir þetta hefur hið mjög skuldsetta hagkerfi ekki farið varhluta af aðstæðum á alþjóðlegum fjármálamörkuðum eins og sést á nýlegri hækkun vaxtaálaga. Áframhaldandi alþjóðlegur vöxtur bankakerfisins hefur leitt til þess að ófyrirséðar fjárhagslegar skuldbindingar ríkisins hafa vaxið upp fyrir það sem æskilegt getur talist.

Í skýrslu Moody's eru ítarlega skýrðar forsendurnar fyrir Aaa-einkunnum Íslands og metin er geta stjórnvalda og banka til að standast erfiðar aðstæður.

Sérfræðingur Moody's segir að auka mætti svigrúm stjórnvalda til að glíma við áhrif kreppu í framtíðinni með viðameiri reglusetningu um lausafé banka eða með öðrum kerfisbreytingum sem milduðu hlutverk stjórnvalda sem lánveitanda til þrautavara í erlendri mynt.

„Samkvæmt greiningu Moody's er líklegt að íslensk stjórnvöld geti mætt lausafjárbresti, varið innstæðueigendur og forðast greiðsluþrengingar jafnvel við sérstaklega erfið skilyrði (e. even in a quite extreme scenario)," segir Feldbaum-Vidra. „Á undanförnum árum hefur Moody's fylgst grannt með vexti erlendra skuldbindinga bankakerfisins. Að því gæti komið að slíkur vöxtur myndi reyna á getu stjórnvalda til að takast á við kreppu, að minnsta kosti með hætti sem samræmdist gildandi Aaa-einkunnum."