Svíþjóð í 5. sæti og beint til Króatíu

Svíþjóð tryggði sér í dag farseðilinn á HM í Króatíu á næsta ári með því að leggja Noreg í tvíframlengdum leik um 5. sætið á EM í handbolta, 36-34.

Noregur þarf hins vegar að taka þátt í undankeppni HM 2009 en dregið verður í undankeppnina á morgun.

Norðmenn náðu í fyrsta skiptið forystunni í leiknum með því að skora fyrsta markið í fyrri framlengingunni og breyta stöðunni í 27-26.

Svíar höfðu verið með sjö marka forystu í seinni hálfleik en misstu niður nánast unnin leik þar sem þeir réðu ekkert við óvænta baráttugleði Norðmanna.

Svíar náðu þó frumkvæðinu aftur og komust einu marki yfir á öllum tölum þar til staðan var 30-30. Þá náðu Norðmenn frumkvæðinu og héldu í sókn þegar mínúta var til loka framlengingarinnar.

En þeir brenndu af síðasta skoti framlengingarinnar og þurfti því að framlengja leikinn öðru sinni.

Svíar komust tveimur mörkum yfir í fyrri hluta síðari framlengingarinnar, 33-31. Norðmenn náðu að minnka muninn í eitt mark, 35-34, þegar mínúta var eftir af framlengingunni en Marcus Ahlm skoraði síðasta mark leiksins á lokasekúndunum og tryggði Svíum sigur, 36-34.

Martin Boquist var markahæstur Svía með sjö mörk en þeir Jonas Källman og Jonas Larholm skoruðu sex mörk hver.

Dan Beutler varði ellefu skot og Tomas Svensson fimm hjá Svíum.

Hjá Norðmönnum var Kjetil Strand markahæstur með tíu mörk en Bjarte Myrhol kom næstur með sjö mörk. Andre Jörgensen skoraði sex mörk í leiknum.

Steinar Ege varði fimmtán skot og Ole Erevik tvö.

Í seinni hálfleik venjulegs leiktíma leit ekki út fyrir annað en að Svíar væru að fara vinna öruggan sigur. Þeir höfðu tveggja marka forystu í hálfleik, 15-13, og skoruðu svo fjögur fyrstu mörkin í síðari hálfleik.

Eftir tíu mínútna leik í seinni hálfleik var munurinn orðinn sjö mörk, 21-14, Svíum í vil.

En á næstu tíu mínútum ráku Norðmenn af sér slyðruorðið og skoruðu átta mörk gegn tveimur og minnkuðu muninn í 23-22.

Þeim tókst svo að jafna metin er þrjár mínútur voru til leiksloka, 26-26, og spennan var í hámarki sem fyrr segir. En ekkert mark var skorað á síðustu mínútum leiksins og þurfti því að grípa til framlengingar.

Svíar voru með boltann á síðustu sekúndunum en Kim Andersson skaut hátt yfir mark Norðmanna úr síðasta skoti venjulegs leiktíma.

Þar með er ljóst að Svíþjóð fer í riðil Íslands í undankeppni Ólympíuleikanna en riðill Íslands fer fram í Póllandi. Auk heimamanna, Íslands og Svíþjóðar keppir Argentína einnig um þau tvö Ólympíusæti sem í boði eru fyrir liðin.