Deildarstjóri Matís varði doktorsverkefni í iðnaðarverkfræði

Sveinn Margeirsson, deildarstjóri hjá Matís, varði doktorsverkefni sitt í iðnaðarverkfræði við verkfræðideild Háskóla Íslands í dag. Verkefnið, sem nefnist Vinnsluspá þorskafla, fjallar um hvernig hægt er að hámarka afrakstur fiskveiða.

Markmið verkefnisins var að safna gögnum um þorskveiðar og vinnslu fjögurra íslenskra sjávarútvegsfyrirtækja, greina þau á tölfræðilegan hátt og setja upp bestunarlíkön til að auðvelda stjórnun á veiðum og vinnslu þorsks á Íslandsmiðum.

Gögnum um flakanýtingu, los og hringorma í þorski var safnað frá 2002 til 2006. Allar þessar breytur hafa veruleg áhrif á hagnað af þorskveiðum og vinnslu.

Niðurstöður verkefnisins gefa til kynna að afrakstur virðiskeðju þorsks geti verið aukinn með því að sækja þorskinn á ákveðin veiðisvæði og á ákveðnum tíma árs en niðurstöðurnar sýndu að flakanýting, los og hringormar í þorski eru m.a. háð veiðistaðsetningu og árstíma.

Sveinn Margeirsson er fæddur árið 1978. Hann lauk stúdentsprófi frá Menntaskólanum við Sund 1997. Árið 2001 hlaut hann B.Sc-gráðu í matvælafræði við Háskóla Íslands. Frá árinu 2003 stundaði Sveinn nám við Háskóla Íslands og Danmarks Tekniske Universitet í iðnaðarverkfæði. Sveinn var eðlisfræðikennari við Menntaskólann við Sund á árunum 1997-1999.

Frá 2003-2006 starfaði hann hjá Rannsóknarstofnun fiskiðnaðarins en frá árinu 2007 hefur hann verið deildarstjóri hjá Matís ohf. Eiginkona Sveins er Þórunn Rakel Gylfadóttir, sjúkraþjálfari og M.Sc í markaðsfræði. Börn þeirra eru Iðunn Fjalldís og Gunnar Jarl. Þá á Þórunn Rakel Kára Eldjárn frá fyrra sambandi.