Lífið

Frábærar viðtökur við Brúðguma Baltasars

Sigríður Elva Vilhjálmsdóttir skrifar
Aðstandendur myndarinnar á frumsýningunni í gær.
Aðstandendur myndarinnar á frumsýningunni í gær.
„Mér líður bara frábærlega. Ég hef sjaldan fengið svona góð viðbrögð", segir Baltasar Kormákur, leikstjóri. Kvikmynd hans, Brúðguminn, var frumsýnd í stútfullu Háskólabíói í gær.



Í ræðu sinni fyrir sýninguna í gær líkti Baltasar því að frumsýna mynd við það að standa nakinn á sviði. Sagði að frumsýningarkvíðinn skánaði ekkert með árunum - þvert á móti versnaði hann. Kvíðinn hefur að líkum til verið óþarfur, en óhætt er að segja að viðtökurnar hafi verið með eindæmum jákvæðar.



Sögusvið Brúðgumans er Flatey á miðju sumri. Myndin gerist að miklu leiti um nótt og það er auðvelt að gleyma því að fyrir utan bíósalinn bíði manns metra háir bunkar af snjó þegar íslensk sumarnótt á Breiðafirðinum blasir við á skjánum. Myndin er lauslega byggð á verki Antons Tsjekhovs, Ívanov. Verk Tsjekhovs hafa haft orð á sér fyrir að vera þung og leiðinleg. Slíku er ekki fyrir að fara í Brúðgumanum sem er allt í senn, falleg, dramatísk, sorgleg en ekki síst bráðfyndin. Baltasar segir að meint leiðindi Tsjekhovs skrifist á þá sem setja hann þannig upp „Verk hans verða oft leiðinleg því að hann er tekinn of hátíðlega", segir Baltasar.



Brúðguminn var unnin samhliða uppfærslu á Ivanov í Þjóðleikhúsinu, og vann sami hópur leikara og listrænna stjórnenda að báðum verkefnum. Baltasar segir að hann hafi verið búinn að velja leikara áður en handritið hafi verið skrifað, og að persónurnar hafi mótast mjög af leikurunum. Þannig talar Ólafur Egilsson í hlutverki sínu um sjálfsofnæmi sem veldur því að hann missir hárið. Þá átti Lárus, persóna Jóhanns Sigurðssonar, sér ungur þann draum að verða óperusöngvari, líkt og leikarinn sjálfur. „Þetta eru svona hlutir sem koma í gegnum vinnuna, við leikum okkur með þeirra tragikómidíur" segir Baltasar.



Það voru ekki bara frumsýningargestir sem hrifust af myndinni. Dreifingarfyrirtækið Wild Bunch í Frakklandi hefur lýst yfir áhuga á að sjá um sölu á myndinni erlendis. Fyrirtækið er eitt hið stærsta á sínu sviði í heimi, og sáu meðal annars um hina geysivinsælu 4 mánuði, 2 vikur og 3 dagar, sem vann meðal annars Gullpálmann á Cannes hátíðinni í fyrra.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.