Veggkrot eftir listamanninn Banksy slegið á 23 milljónir kr.

Veggur á húsi í London var boðinn upp á netinu og að lokum sleginn á rúmlega 23 milljónir króna. Á veggnum er verk eftir hin dularfulla veggkrotslistamann Banksy.

Þetta verk Banksy prýðir vegg á fjölmiðlafyrirtæki við Portobelloroad í vesturhluta London. Það var sett til sölu á uppboðsvefnum eBay og bárust alls 69 tilboð í verkið. Um er að ræða stærsta verk eftir Banksy sem selt hefur verið á uppboði.

Það athyglisverða við þetta allt er að enginn veit með vissu hver Banksy er. Ekki var um að ræða að Banksy hefði málað verkið í skjóli nætur heldur fékk hann fólk til að setja dúk yfir vegginn svo hann gæti krotað verkið í friði. Á ebay var að finna nákvæma lýsingu á því hvernig Banksy tókst að mála verkið án þess að upp kæmist hver hann í rauninni er.

Listfræðingar eru sammála um að hæfileikar Banksy sem myndlistarmanns séu óumdeildanlegir og nú þykir enginn maður með mönnum meðal listunnenda í Bretlandi og víðar nema viðkomandi eigi verk eftir hann. Sá sem keypti vegginn verður nú að skera hann í burtu frá húsinu og byggja annan vegg í staðinn og er talið að slíkt muni kosta um 700.000 krónur í viðbót við kaupverðið.