Fróðlegt að sjá Vigni og Ásgeir

„Ég held að aðalatriðið í leikjunum við Tékka er að við spilum góðan varnarleik. Það er nauðsynlegt að spila góða vörn til að ná árangri í Noregi," sagði Aron Kristjánsson, einn þriggja sérfræðinga Vísis um EM í handbolta.

Ísland mætir Tékkum klukkan 16.00 í dag og svo aftur annað kvöld en það eru síðustu leikir liðsins fyrir EM í Noregi sem hefst á fimmtudaginn.

„Það verður sérstaklega fróðlegt að sjá hvernig miðsvæðið í vörninni verður. Sverre er búinn að vera mikið veikur og Sigfús er út í Noregi með B-landsliðinu. Það verður því forvitnilegt að sjá hvernig Vignir og Ásgeir koma inn í þetta hlutverk og hvernig það muni þróast," sagði Aron.

En hann segir það einnig mikilvægt ef íslenska landsliðið vinni að minnsta kosti annan leikinn gegn Tékkum.

„Við unnum enga leiki í Danmörku um síðustu helgi þar sem við vorum engu að síður að spila ágætlega. Þar fékk Alfreð líka tækifæri til að prófa ýmsa hluti en ég held að það sé mikilvægt að vinna leik til að efla sjálfstraustið fyrir mótið sjálft."

Tékkar verða án síns sterkasta leikmanns, Filip Jicha, sem á við meiðsli að stríða.

„Hann er yfirburðamaður í sóknarleiknum þeirra og fjarvera hans ætti að gera það að verkum að við eigum meiri möguleika í leiknum. En við eigum eftir að mæta sterkari þjóðum en Tékkum þegar í mótið er komið. Bæði erum við í erfiðum riðli og ef við komust áfram bíður okkar erfiður milliriðill."

Arnór Atlason og Alexander Petersson hafa átt við meiðsli að stríða en sá síðarnefndi spilaði ekkert í æfingamóti í Danmörku um síðustu helgi.

„Ég held að það væri mjög gott ef Alex myndi alla vega spila annan leikinn. Það sama má segja um Arnór en það var góður stígandi í hans leik í Danmörku. Það gefur manni von um að hann fari loksins að standa sig með lansliðinu eftir erfiðleikatímabil."

Annar mikilvægur þáttur í leikjum Íslands og Tékklands að mati Arons er stuðningur áhorfenda.

„Íslendingar þurfa að pakka vel í höllina og styðja vel við bakið á strákunum. Þegar út í slaginn er komið í Noregi verða væntanlega mikið af Svíum á pöllunum í fyrsta leiknum. Það verða því væntanlega mikil læti og því mikilvægt að strákarnir upplifi leikina gegn Tékkum sem alvöru leiki, ekki bara æfingaleiki."