Tveir nýir framkvæmdastjórar hjá Icebank

Í tengslum við breyttar áherslur í rekstri Icebank hefur skipulagi bankans verið breytt. Nýju tekjusviði, fyrirtækjaráðgjöf, hefur verið bætt við og tveir nýir framkvæmdastjórar hafa verið ráðnir, þeir Aðalsteinn Jóhannsson og Sveinn Andri Sveinsson.

Fyrirtækjaráðgjöf mun veita viðskiptavinum Icebank þjónustu við kaup og sölu á fyrirtækjum hér heima og erlendis með áherslu á tækifæri fyrir fjárfesta í Austur-Evrópu. Einnig hefur rekstrarsviði bankans verið skipt upp og nýtt svið, fjármála- og upplýsingatæknisvið, tekið til starfa.

Aðalsteinn Jóhannsson hefur verið ráðinn framkvæmdastjóri fyrirtækjaráðgjafar Icebank. Aðalsteinn var annar stofnenda Behrens Fyrirtækjaráðgjafar hf. sem Icebank keypti síðastliðið haust. Behrens Fyrirtækjaráðgjöf hefur á undanförnum árum haslað sér völl á sviði ráðgjafar við kaup og sölu á fyrirtækjum á Íslandi og í Eystrasaltsríkjunum, þar sem félagið hefur verið eitt af leiðandi fyrirtækjum á því sviði.

Fyrir stofnun Behrens Fyrirtækjaráðgjafar hf. starfaði Aðalsteinn m.a. sem fjárfestingastjóri hjá Íslenska hugbúnaðarsjóðnum. Aðalsteinn útskrifaðist sem viðskiptafræðingur frá Háskólanum í Reykjavík árið 2001.

Sveinn Andri Sveinsson hefur verið ráðinn framkvæmdastjóri fjármála- og upplýsingatæknisviðs Icebank. Sveinn Andri hefur verið framkvæmdastjóri Hands Holding hf. frá desember 2006, eignarhaldsfélags í upplýsingatæknigeiranum með starfsemi í fimm löndum. Áður en Sveinn Andri hóf störf hjá Hands Holding var hann framkvæmdastjóri fjármálasviðs EJS og hluta af tímanum einnig framkvæmdastjóri EJS Group.

Sveinn Andri var framkvæmdastjóri fjármálasviðs Norðurljósa og Íslenska útvarpsfélagsins frá 1996. Fyrir þann tíma starfaði Sveinn Andri m.a. hjá KPMG og Connecticut Bank and Trust ásamt því að kenna við Verslunarskóla Íslands. Sveinn Andri er viðskiptafræðingur af endurskoðunarsviði frá Háskóla Íslands og útskrifaðist þaðan árið 1988.