Skipti meðal þriggja bjóðenda í slóvenska símann

Skipti hf., móðurfélag Símans, gerði í dag tilboð í slóvenska fjarskiptafélagið Telekom Slovenije.

Til stendur að selja tæplega helmingshlut í félaginu í þessari umferð til kjölfestufjárfestis sem mun í kjölfarið þurfa að gera öðrum hluthöfum í félaginu yfirtökutilboð, að undanskildu slóvenska ríkinu sem halda mun eftir fjórðungshlut. Fram kemur í tilkynningu frá Skiptum að tilboðið sé gert með hefðbundnum fyrirvörum og bundið trúnaði samkvæmt samkomulagi við slóvensk stjórnvöld.

Telekom Slovenije er leiðandi fjarskiptafyrirtæki í Slóveníu auk þess að vera með vaxandi starfsemi í nágrannalöndunum. Hjá félaginu starfa um 4.400 starfsmenn. Tekjur félagsins á fyrstu 9 mánuðum ársins 2007 námu um 54 milljörðum króna og hagnaður félagsins fyrir skatta nam um 9,4 milljörðum íslenskra króna.

Fram hefur komið í fréttum að Árni Mathiesen fjármálaráðherra hefur heimilað eigendum Skipta að fresta því að setja félagið á markað fram í lok mars. Samkvæmt samningi sem gerður var við sölu Símans árið 2005 áttu Skipti að fara á markað fyrir árslok 2007 þar sem almennum fjárfestum yrði gefinn kostur á að kaupa um 30 prósent í félaginu.