Askar selja fagfjárfestum hluti í gjaldeyrissjóði

Askar Capital hefur stofnað gjaldeyrissjóð fyrir fagfjárfesta, sem formlega tók til starfa 1. júní. Sjóðurinn hefur þó verið rekinn innan Askar Capital um tólf mánaða skeið. Sala á sjóðnum stendur nú yfir til fagfjárfesta.

Fjallað var um tækifæri á gjaldmiðlamarkaði á morgunfundi Askar í gær. Helstu niðurstöður fundarins eru að gjaldmiðlar eru eignaflokkur sem skilað getur góðri ávöxtun og hefur litla fylgni við hefðbundna eignaflokka. Fagfjárfestar sem bæta við gjaldeyrissjóði í tiltölulega litlu vægi við eignasafn geta minnkað verulega áhættu auk þess sem þeir auka ávöxtun á safn sitt.

Í tilkynningu um fundinn segir að athygli á gjaldmiðla hefur aukist í kjölfar lausafjárkreppunnar, enda eru gjaldmiðar í eðli sínu afar seljanlegur og gagnsær eignarflokkur. Gjaldmiðlamarkaðir hafa jafnframt meiri óskilvirkni og leitni heldur en skuldabréfa- og hlutabréfamarkaðir, enda margir stórir aðilar sem hafa gjaldeyrisvarnir að leiðarljósi en ekki hámarks arðsemismarkmið.

Tryggvi Þór Herbertsson, forstjóri Askar Capital, opnaði fundinn og minntist í erindi sínu á að innan raða Askar Capital er samtals yfir sjötíu ára reynsla af gjaldmiðlaviðskiptum. Þá hefur fyrirtækið og forveri þess gefið út tímarit um gjaldeyrismál um fimmtán ára skeið.

John Normand, framkvæmdastjóri alþjóðlegs FX sviðs JP Morgan,fjallaði um gjaldeyri sem eignaflokk og um mikilvægi virkrar stýringar gjaldmiðla í eignasöfnum. Einnig ræddi hann um framtíðarhorfur gjaldeyrismarkaða og taldi að árið 2009 gæti orðið viðburðaríkt miðað við núverandi verðbólguhorfur.