Forstjóri Iceland keðjunnar kallaður fyrir skilanefndir Glitnis og Landsbankans

Forsvarsmenn Iceland verslunarkeðjunnar, þar sem Baugur er stærsti hluthafinn, voru kallaðir á fund með skilanefndum Glitnis og Landsbankans í Austurstræti í dag. Rætt var um eign íslensku bankanna í keðjunni og skuldir.

Iceland verslunarkeðjan telur yfir 660 verslanir víðs vegar um Bretland og Írland. Baugur á um 40% hlut í keðjunni, en gamli Landsbankinn og Glitnir eru líka hluthafar.

Vel hefur gengið hjá Iceland síðustu mánuði og nam söluaukning þeirra á síðustu þremur mánuðum um 11%. Keðjan hefur upp á síðkastið verið nefnd einhver verðmætasta eign íslensku bankanna á Bretlandseyjum.

Jón Ásgeir tók við stjórnarformennsku í félaginu í lok október og var í dag mættur ásamt forsvarsmönnum Iceland á fund skilanefnda Glitnis og Landsbankans. Malcom Walker, stofnandi og forstjóri Iceland, var með í för.

Fréttastofu hefur heimildir fyrir því að á fundinum hafi Iceland gert skilanefndum grein fyrir stöðu sinni. Ekkert kauptilboð hefur borist í hlut bankanna og mun keðjan ekki vera til sölu nema fyrir verulegar fjárhæðir.

Hópur mótmælenda veittist að Jóni Ásgeiri fyrir utan 101 hótel í dag.

Lögregla var kölluð til og þurfti að skerast í leikinn svo ljóst er að slegið hefur í brýnu milli mótmælenda og Jóns Ásgeirs.