FL fækkar starfsfólki

Fimm var sagt upp hjá FL Group í gær samkvæmt heimildum Vísis og hefur starfsmönnum félagsins því verið fækkað úr 37 í 26 frá áramótum.

Júlíus Þorfinnsson forstöðumaður samskiptasviðs FL Group staðfestir að endurskipulagning sé í gangi hjá félaginu sem meðal annars hefur haft í för með sér að starfsfólki hafi verið fækkað úr ríflega 40 á síðasta ári í 26.

Áður hafði skrifstofum FL í Kaupmannahöfn verið lokað auk þess sem fækkað var í starfsliði skrifstofu félagsins í London.

Aðspurður hvort frekari hagræðingar sé að vænta hjá FL svaraði Júlíus að félagið væri stöðugt að leita leiða til þess að hagræða í rekstri. Menn yrðu áfram með augun opin fyrir því.