Írska ríkið tryggir bankana

Írska ríkið hefur gengist í ábyrgðir fyrir skuldbindingar banka þar í landi næstu tvö árin. Ákvörðunin kemur í framhaldi af mikilli lækkun á gengi hlutabréfa í írskum fjármálafyrirtækjum í gær en tilefni þótti til að róa fjárfesta. Bankarnir sem ríkið tryggir eru Allied Irish Banks, Bank of Ireland, Anglo Irish Bank Corp. Irish Life and Permanent, Irish Nationwide Building Society og Educational Building Society. Fréttastofa Bloomberg segir ákvörðunina koma í framhaldi af aðgerðum ríkisstjórna og seðlabanka víða um heim til að tryggja fjármálalegan stöðugleika. Þá má nefna að breska ríkið tók breska bankann Bradford & Bingley yfir í gær og ríkisstjórnir Belgíu, Hollands og Lúxemborgar settu 11,2 milljarða evra inn í Fortis-banka til að bæta eiginfjárstöðu hans.