Kiel í sterkri stöðu

Kiel vann í dag sigur á Ciudad Real, 29-27, í fyrri viðureign liðanna í úrslitum Meistaradeildar Evrópu.

Leikurinn fór fram á Spáni og stendur því Kiel afar vel að vígi fyrir síðari viðureignina sem fer fram í Þýskalandi um næstu helgi.

Kiel hafði forystu í hálfleik, 14-13, en Ciudad Real náði frumkvæðinu snemma í síðari hálfleik. Þjóðverjarnir náðu hins vegar undirtökunum aftur síðasta stundarfjórðunginn og unnu góðan tveggja marka sigur.

Ólafur Stefánsson átti þó góðan leik í liði Ciudad Real og skoraði sjö mörk auk þess sem hann átti fjölda stoðsendinga.