Árni kominn í annað sætið yfir versta bankamann heimsins

Árni Mathiesen fjármálaráðherra er nú kominn í annað sætið í netkosningunni um versta bankamann heimsins. Hefur Árni hlotið 17% atkvæða en Alan Greenspan fyrrum seðlabankastjóri Bandaríkjanna er í fyrsta sæti með rúmlega 23% atkvæða.

Eins og fram kom á visir.is í gær er það bandaríska vefsíðan The Huffington Post sem stendur að netkosningunni um hver sé versti bankamaður heimsins.

Netkosningin þessi er gerð í framhaldi af grein Daniel Gross í tímaritinu Newsweek um hver eigi titilinn versti bankamaður heims. Greint var frá þeirri grein á visir.is á miðvikudag.

Aðeins tveir aðrir bankamenn eru með meir en 10% atkvæða í kosningunni en það eru Hank Paulson fjármálaráðherra Bandaríkjanna sem er með rúm 16% og Richard Fuld forstjóri Lehman Brothers sem er með rúm 13%.

Hægt er að fylgjast með kosningunni á slóðinni:

http://www.huffingtonpost.com/2008/12/03/whos-the-worlds-worst-ban_n_148098.html