Tryggingarmiðstöðin styrkir Þjóðhátíð vegna bruna

Tryggingamiðstöðin (TM) hefur ákveðið að styrkja aðstandendur Þjóðhátíðar í Vestmannaeyjum til uppbyggingar á þeim mannvirkjum sem skemmdust eða eyðilögðust í eldsvoða í lok maí. Um er að ræða umgjörð Þjóðhátíðar sem haldin er árlega um verslunarmannahelgina í Herjólfsdal í Vestmannaeyjum.

„Mannvirkin voru ekki tryggð og því er tjónið sem af hlaust alfarið á kostnað eigenda. TM á djúpar rætur í Vestmannaeyjum og því hefur verið ákveðið að kosta allt efni sem þarf til að endurgera mannvirkin. TM mun einnig aðstoða fórnfúsa sjálfboðaliða í Vestmannaeyjum af fremsta megni til að halda megi enn á ný glæsilega Þjóðhátíð í Herjólfsdal," segir Guðbjörg Karlsdóttir, útibústjóri TM í Vestmannaeyjum.

„Stuðningur TM til uppbyggingar á mannvirkjunum skiptir sköpum. Aðstandendur Þjóðhátíðar sem og Eyjamenn séu TM afar þakklátir fyrir framlagið. Þjóðhátíð er einn af hápunktum í lífi Eyjamanna ár hvert og skiptir þetta syðsta samfélag Íslands miklu máli. ÍBV hefur veg og vanda að skipulagningu Þjóðhátíðar og er hátíðin afar mikilvæg fjáröflunarleið fyrir félagið," segir Tryggvi Már Sæmundsson framkvæmdastjóri Þjóðhátíðarnefndar.

Þetta kemur fram í fréttatilkynningu frá TM.