Ástarljóð Strandamanns

Strandamaðurinn Bjarni Ómar Haraldsson hefur gefið út sína aðra sólóplötu sem nefnist Fyrirheit. Hefur hún að geyma melódískt popp í rólegri kantinum.

„Ég er að yrkja um ástina, sem er þessi uppspretta alls góðs og ills," segir Bjarni Ómar Haraldsson um yrkisefni sín á nýrri plötu sem var að koma út.

Bjarni, sem er deildarstjóri Tónskólans á Hólmavík, sendi síðast frá sér plötu fyrir áratug sem nefnist Annað líf. Hann segist hafa þroskast mikið sem manneskja síðan þá. „Vinnslan hefur líka gjörbreyst og lögin eru miklu betri."

Auk þess að semja sjálfur texta naut hann aðstoðar sex textahöfunda til viðbótar. Hann segir útkomuna vera heilsteypta og vonast til að hlustendur séu á sama máli.

Það er ekki á hverjum degi sem Strandamenn gefa út poppplötur. „Samkvæmt mínum heimildum er þetta fyrsti diskurinn sem er gefinn út þarna með svona tónlist," segir hann og bætir við að Mugison, sem býr á Súðavík, sé líklega sá eini sem hafi verið í svipaðri útgáfu. Hann vill þó ekki líkja sér saman við hann. „Við erum ólíkir tónlistarlega. Ég er jarðbundinn höfundur og er ekki að eltast við neina tískustrauma," segir hann.

Bjarni Ómar ætlar að spila á Players í kvöld og í framhaldinu ætlar hann að kynna plötuna víðar með píanóleikaranum Stefáni Jónssyni.