Stabæk búið að samþykkja tilboð Nancy

Veigar Páll Gunnarsson er á leið til franska úrvalsdeildarfélagsins Nancy en lið hans í Noregi, Stabæk, hefur samþykkt tilboð franska liðsins í Veigar.

Fram kemur á heimasíðu Stabæk að félögin hafi náð saman í öllum meginatriðum og að aðeins eigi eftir að ganga frá sjálfum samningnum sem er formsatriði.

Veigar Páll er nú staddur í fríi í Bandaríkjunum en hann mun fljótlega fara til Frakklands til að semja um kaup og kjör auk þess sem hann mun gangast undir læknisskoðun.

Lars Bohinen, yfirmaður íþróttamála hjá Stabæk, segir að félagið muni sjá á eftir Veigari en ákveðið hafi verið að selja hann nú, eingöngu af efnahagslegum ástæðum.

Veigar á eitt ár eftir af samningi sínum við Stabæk og hefur áður sagt að hann vilji gjarnan fá að reyna sig hjá sterkara liði.