Áfram lækkanir í Kauphöllinni

Úrvalsvísitalan hélt áfram að lækka í Kauphöllinni í dag og þegar mörkuðum var lokað laust eftir klukkan fjögur hafði hún lækkað um 1,44 prósent og stóð í 4.816 stigum.

Bréf í álframleiðandanum Century Aluminum lækkuðu mest í dag, eða um 3,40 prósent, en hlutabréf í fyrirtækinu hafa þó hækkað frá áramótum um nærri 30 prósent.

Næstmesta lækkunin í dag var hjá Teymi, um 2,73 prósent, og þá lækkaði gengi Straums um tæp tvö prósent. Glitnir og Kaupþing voru hins vegar einu fyrirtækin sem hækkuðu í dag, Glitnir um 0,60 prósent og Kaupþing um 0,14 prósent.