Stjórn FL Group vill helmingi lægri laun

Stjórn FL Group gerir tillögu um að þóknun til stjórnarmanna félagsins vegna næsta rekstrarárs lækki um helming. Þetta kemur fram í fundarboði vegna aðalfundar FL Group, sem haldinn verður þann 11. mars næstkomandi.

Lagt er til að aðalfundur FL Group samþykki að laun stjórnarformanns verði kr. 350.000 á mánuði. Laun varaformanns verði kr. 250.000 á mánuði og aðrir stjórnarmenn fái kr. 175.000 í laun á mánuði. Þá er lagt til að varamönnum verði greiddar kr. 50.000 fyrir hvern setinn fund.

Þá er lagt til að stjórnarmenn fái fasta þóknun fyrir hvern fund sem þeir sitji í undirnefndum stjórnar og sú þóknun verði kr. 100.000 til handa formönnum nefnda fyrir hvern fund en kr. 50.000 til handa öðrum nefndarmönnum. Þóknun fyrir fundasetu í undirnefndum á tímabilinu skuli þó ekki vera hærri en kr. 600.000 fyrir formann nefndar og kr. 300.000 fyrir aðra nefndarmenn.